Pólstjarnan

Dagurinn í dag bauð uppá mjög fjölbreyttar aðstæður. Við vöknuðum í þoku í morgun sem breyttist í heiðskýrt veður og logn sem var nýtt til myndatöku þar sem þurfti að haka við á listanum að eiga mynd af Pólstjörnunni með borgarísjaka í bakgrunni. Lognið breyttist svo í brælu þegar út úr firðinum var komið, og þá kom breytt í bakið á knoll og tott að hafa ekki nennt að ganga almennilega frá gúmmibátnum, sem þeir höfðu þó sammælst um að gera nema bara í blíðasta og besta. Þegar í bræluna var komið var fátt að gera nema að búa við að hafa bátinn hangandi lauslega í gálgunum og troða á milli fenderum þar sem því var við komið. Fyrir utan fjörðin var 13-15 metra vindur og ölduhæð 2 metrar sem var ekki vandamál fyrir Pólstjörnuna, en gúmmibáturinn fékk að súpa á því nokkrum sinnum. Þéttur ís hafði safnast sunnan við fjarðarmynnið og við enduðum á því að sigla einhverjar 13 mílur meðfram ísnum í töluverðum veltingi. Þegar fór að greiðast úr ísflækjunni var stefnan tekinn inn í ísinn, og þegar þangað var komið dempaðist allt sjólag og við tók ratleikur á milli jaka. Íshröngið þéttist svo eftir því sem sunnar dró og við þurftum að finna leið út, en eftir að við losnuðum úr ísnum, þá fengum við þetta fína lens það sem eftir var ferðar, en áfangastaðurinn var áður ákveðin miðað við þær fáu ársprænur sem eina kortið okkar sýndi og þóttu veiðilegar. Þegar til kom voru vötn og lækir að mestu jökulís og skriðjöklar, en fundum samt einn læk þar sem búið er að leggja út net og við erum vongóð um að nú verði hugnurvofunni bægt frá í langan tíma. Líðum þó engan skort, og frú Sóley bauð uppá steikt lambalæri og brúnaðar kartöflur. Eigum líka einhverjar grillsteikur, og hreidýrasteikur, og 5 kg af þorskhnökkum og svo auðvitað neyðarmatinn ef þetta gengur ekki núna. Ætluðum okkur að vera á algerlega ókönnuðu landi í kvöld, en þau plön klikkuðu heldur betur, því rétt sem við vorum að kasta akkerum sáum við heilan gönguhóp sem hafði slegið upp tjöldum í fjörunni. Hvergi friður......